Хувийн мэдээллийн бодлого
Энэ хуудас solio.mn таны ямар мэдээллийг цуглуулж, юунд ашиглаж, хэнд дамжуулж, хэр хугацаанд хадгалдгийг, мөн та ямар эрхтэй байдгийг тайлбарлана. Хүний хувийн мэдээлэл хамгаалах тухай хуулийн дагуу бичигдсэн. Үйлчилгээний бусад нөхцөлийг Үйлчилгээний нөхцөл хуудаснаас уншина уу.
1. Мэдээлэл хариуцагч
Таны мэдээллийг боловсруулах шийдвэрийг гаргадаг тал бол solio.mn платформыг хөгжүүлж, ажиллуулж байгаа хувь хүн. Холбоо барих: solio.mn2026@gmail.com, 9585 9278.
Мэдээлэлтэй холбоотой аливаа хүсэлт, гомдлыг энэ хаягаар шууд хүлээн авна. Тусдаа мэдээлэл хамгаалах ажилтан томилоогүй. Хүсэлтийг хариуцагч өөрөө шийдвэрлэнэ.
2. Нийтэд юу харагддаг
Solio бол зар тавьдаг, өөрөөр хэлбэл нээлттэй платформ. Ном хадгалах цэгээр дамжихдаа түүнийг авах хүн нь номоо тушаасан хүнтэй уулзахгүй. Тэдний харах зүйл бол тэр хүний нийтийн хуудас, тиймээс профайлын дийлэнх хэсэг зориудаар нээлттэй байдаг. Энэ хэсэг хамгийн эхэнд байгаа шалтгаан нь тэр.
2.1. Бүртгэлгүй хүн ч гэсэн дараахыг харна: таны харагдах нэр, хэрэглэгчийн нэр (@нэр), профайлын зураг, танилцуулга, хот, Solio-д нэгдсэн огноо, тавьсан номнууд болон тэдгээрийн зураг, нөхцөл, ангилал, уншсан номын тэмдэглэгээ, номын тухай бичсэн сэтгэгдэл, сураглал, бусад хүнд өгсөн үнэлгээ, танд өгсөн үнэлгээний дундаж, дагагчийн тоо, авсан, өгсөн номнуудын түүх.
2.1.1. Номын байршил. Хадгалах цэгт тушаасан номын байршил нийтэд харагдана. Солилцооны бүх санаа нь «ямар ном хаана байна» гэдэг асуултанд хариулахад байгаа тул өөрөөр байх боломжгүй. Гартаа байгаа, цэгт тушаагаагүй номын байршил харагдахгүй.
2.2. Хэзээ ч нийтэд харагдахгүй: и-мэйл хаяг, нэвтрэх нэр/нууц үг, утасны дугаар (хадгалах цэгээс бусад), таны хайлтын түүх, үзсэн номнууд, мэдэгдлийн тохиргоо, зурвасууд, бидэнд илгээсэн санал хүсэлт эсвэл гомдол.
2.3. Хадгалах цэг. Хэрэв та хадгалах цэг (кафе, номын сан, дэлгүүр) болбол цэгийн хаяг, утас, ажиллах цаг болон газрын зураг дээрх байршил (таны оруулсан Google Maps холбоосоос) нь үйлчилгээний мөн чанараас шалтгаалан нээлттэй. Хүн номоо тэнд авчрах, авч явах шаардлагатай тул өөрөөр байх боломжгүй.
Нийтэд харагдах зүйлийг хайлтын систем (Google гэх мэт) индексжүүлж, хуулбарыг өөр дээрээ хадгалж болно. Бид тэдгээрийн кэшийг хянах боломжгүй. Тиймээс профайлдаа өөрийн гэрийн хаяг, ажлын газар, утасны дугаар зэрэг мэдээллийг бичихгүй байхыг хүсье.
3. Ямар мэдээлэл цуглуулдаг
- Бүртгэлийн мэдээлэл
- И-мэйл хаяг, нууц үг (шифрлэгдсэн хэлбэрээр, бид үүнийг уншиж чаддаггүй), хэрэглэгчийн нэр, харагдах нэр. Google-ээр бүртгүүлбэл Google-ээс и-мэйл хаяг, нэр, профайлын зураг, Google бүртгэлийн дугаарыг хүлээн авна. Бид таны Google нууц үгийг хэзээ ч авдаггүй.
- Профайлын мэдээлэл
- Таны өөрөө оруулсан профайлын зураг, танилцуулга, хот. Бүгд заавал биш, хоосон орхиж болно.
- Контент
- Байршуулсан ном, номын зураг, нөхцөл, тайлбар, уншсан номын тэмдэглэгээ, сэтгэгдэл, үнэлгээ, сураглал, «уншмаар байгаа» жагсаалт.
- Ном дамжуулалтын мэдээлэл
- Хадгалах цэгт тушаасан, хандивласан, оноогоор авсан бичлэг, QR уншуулсан цаг, өмчлөл шилжсэн бичлэг, онооны тооцоо. Эдгээр нь маргаан шийдвэрлэх үндэс болдог тул тусад нь, дэлгэрэнгүй хадгалагдана.
- Зурвас
- Хоёр хэрэглэгчийн хооронд бичсэн зурвас, илгээсэн цаг. Зурвасыг зөвхөн тэр хоёр тал харна. Модератор бусдын харилцааг нэгжих эрхгүй, зөвхөн гомдол гаргасан зурвасыг шалгана. Харилцааг цэвэрлэвэл тэр тал дээр дахин харагдахгүй болно.
- Үйл хөдлөлийн мэдээлэл
- Санал болголтыг тохируулах зорилгоор таны үзсэн ном, дарсан ангилал бүртгэгддэг. Санал болголт нь зөвхөн сүүлийн 180 хоногийн бичлэгийг харна. Эдгээр нь нийтэд харагдахгүй, өөр хэрэглэгчид харагдахгүй.
- Мэдэгдлийн мэдээлэл
- Та хөтчийн мэдэгдлийг зөвшөөрвөл хөтчийн мэдэгдлийн хаяг (endpoint), шифрлэлтийн түлхүүр, хөтчийн нэр/хувилбар (user agent) хадгалагдана. Зөвшөөрөөгүй бол эдгээр байхгүй.
- Аудитын бичлэг
- Хэн, хэзээ, ямар үйлдэл хийсэн (ном нэмсэн, хандив зөвшөөрсөн, гомдол шийдвэрлэсэн гэх мэт). Залилан, зүй бус хэрэглээ, маргааныг шалгахад шаардлагатай.
- Техникийн лог
- Платформ өөрөө таны IP хаягийг бүртгэдэггүй. Гэхдээ сервер, мэдээллийн сангийн үйлчилгээ үзүүлэгчид (доорх 7-р зүйл) хүсэлт бүрийн IP хаяг, цаг, хөтчийн мэдээллийг өөрсдийн лог дээр түр хугацаанд хадгалдаг. Энэ нь интернэтийн техникийн шаардлага бөгөөд бид түүнийг өөрчилж чадахгүй.
3.1. Бид онцгой мэдээлэл (эрүүл мэнд, яс үндэс, шашин шүтлэг, улс төрийн үзэл, бэлгийн чиг хандлага, биометрик, генетик мэдээлэл) цуглуулдаггүй, асуудаггүй. Хэрэглэгч өөрөө танилцуулгадаа эсвэл сэтгэгдэлдээ бичвэл энэ нь таны өөрийн шийдвэр.
3.2. Бид банкны карт, төлбөрийн мэдээлэл цуглуулдаггүй. Платформ үнэгүй бөгөөд төлбөрийн систем хэрэглэдэггүй.
4. Ямар үндэслэлээр
Мэдээлэл боловсруулах үндэслэл бүрийг зорилготойгоо хамт нэрлэе:
- Гэрээ (үйлчилгээ үзүүлэх): бүртгэл үүсгэх, нэвтрүүлэх, ном тавих, хадгалах цэгээр ном дамжуулах, онооны тооцоо хөтлөх, мэдэгдэл хүргэх. Үүнгүйгээр платформ ажиллахгүй.
- Таны зөвшөөрөл: хөтчийн мэдэгдэл, профайлын нэмэлт мэдээлэл (зураг, танилцуулга, хот), хил дамнасан дамжуулалт (8-р зүйл). Зөвшөөрлийг хэзээ ч татаж авч болно.
- Хуулийн үүрэг: эрх бүхий байгууллагын хууль ёсны шаардлагад хариу өгөх, аудитын бичлэг хөтлөх.
- Зүй ёсны хэрэгцээ: залилан, спам, зүй бус хэрэглээг илрүүлэх, платформын аюулгүй байдал, маргаан шийдвэрлэх. Санал болголт ч энд багтана. Та үүнийг унтраахыг хүсвэл 11-р зүйлээр хандана уу.
4.1. Бид таны мэдээллийг зар сурталчилгаанд ашигладаггүй, зардаггүй, зээлийн үнэлгээнд өгдөггүй, гуравдагч талын зар сурталчилгааны хяналтын script (tracker) ажиллуулдаггүй.
4.2. Бид автоматжуулсан шийдвэр гаргалтаар таны эрхийг хязгаарладаггүй. Санал болголт нь зөвхөн ямар ном дээш харагдахыг эрэмбэлдэг; бүртгэл түдгэлзүүлэх зэрэг шийдвэрийг хүн шалгаж гаргана.
5. Күүки
5.1. Бид зөвхөн зайлшгүй шаардлагатай күүки ашиглана. Хоёр л күүки бий: таныг нэвтэрсэн байдалд байлгах session күүки (үүнгүйгээр хуудас дамжих үед та бүр л дахин нэвтрэх болно) болон та сонгосон өнгийг (гэрэл/бараан) санах күүки (үүнгүйгээр хуудас эхлэхдээ буруу өнгөөр анивчина).
5.2. Зар сурталчилгааны, хөндлөнгийн хяналтын, эсвэл гуравдагч талын analytics күүки байхгүй. Тиймээс күүкигийн зөвшөөрөл асуух баннер ч байхгүй.
5.3. Мөн таны хөтөч дээр (localStorage) сонгосон өнгө (гэрэл/бараан), хамгийн сүүлд үзсэн хуудас зэрэг жижиг тохиргоог хадгална. Эдгээр нь зөвхөн таны хөтөч дээр байх бөгөөд бидэнд ирдэггүй.
6. Мэдэгдэл
6.1. Платформ дээрх мэдэгдэл (хонх) нь бүртгэлийн салшгүй хэсэг. Номыг нь хэн авахыг хүссэн, хандив зөвшөөрөгдсөн, шинэ зурвас ирсэн зэргийг та мэдэх ёстой.
6.2. Хөтчийн мэдэгдэл нь зөвхөн та зөвшөөрснөөр ажиллана. Хөтчийн мэдэгдэл нь таны хөтчийн үйлдвэрлэгчийн push үйлчилгээгээр (Chrome нь Google, Firefox нь Mozilla, Safari нь Apple) дамжина. Мэдэгдлийн агуулга нь шифрлэгдсэн тул уг үйлчилгээ түүнийг уншиж чадахгүй, гэхдээ танд мэдэгдэл явсан гэдгийг харна.
6.3. Зөвшөөрлөө Тохиргоо хуудаснаас, эсвэл хөтчийн тохиргооноос хэзээ ч цуцалж болно. Цуцлахад хадгалагдсан хаяг, түлхүүр устана.
7. Хэнд дамждаг
7.1. Платформыг ажиллуулахад дараах үйлчилгээ үзүүлэгчид (үүрэг гүйцэтгэгчид) шаардлагатай. Тэд зөвхөн бидний даалгасан зорилгоор боловсруулна:
- Supabase (Supabase Inc., АНУ)
- Нэвтрэлт болон мэдээллийн сан. Таны и-мэйл хаяг, шифрлэгдсэн нууц үг, профайл, контент, ном дамжуулалтын бичлэг бүгд тэдний сервер дээр хадгалагдана. Бүртгэл батлах, нууц үг сэргээх и-мэйлийг ч тэднээр дамжуулж илгээнэ.
- Cloudflare R2 (Cloudflare, Inc., АНУ)
- Ном, профайлын зургууд хадгалагдах файл сан.
- Vercel (Vercel Inc., АНУ)
- Вэбсайтыг ажиллуулж, хүсэлтийг хүлээн авдаг сервер. Хүсэлтийн лог (IP хаяг, цаг, хөтөч) тэнд түр хугацаанд бүртгэгдэнэ.
- Google (Google LLC, АНУ)
- Зөвхөн та Google-ээр нэвтрэхийг сонгосон тохиолдолд. Google бидэнд и-мэйл, нэр, зураг дамжуулах ба та тэдэнд нэвтэрсэн гэдгээ харуулна.
- Хөтчийн push үйлчилгээ
- Google, Mozilla, Apple. Зөвхөн та хөтчийн мэдэгдэл зөвшөөрсөн бол (6-р зүйл).
7.2. Мөн хуульд заасан үндэслэлээр эрх бүхий байгууллагад (шүүх, цагдаа, прокурор) шаардсан хэмжээгээр дамжуулж болно. Хууль зөвшөөрвөл ийм шаардлага ирсэн талаар танд мэдэгдэхийг зорино.
7.3. Бид таны мэдээллийг хэнд ч зардаггүй, маркетингийн зорилгоор гуравдагч талд дамжуулдаггүй.
8. Хил дамнасан дамжуулалт
8.1. Дээрх үйлчилгээ үзүүлэгчдийн сервер нь Монгол Улсын гадна байрладаг. Өөрөөр хэлбэл таны мэдээлэл Монгол Улсын хилээс гарч боловсруулагдана.
8.2. Платформыг ашиглаж, бүртгэл үүсгэснээр та үүнд зөвшөөрч байгаад тооцогдоно. Хэрэв та зөвшөөрөхгүй бол платформыг ашиглах боломжгүй. Монголд байрлах сервер одоогоор байхгүй.
8.3. Эдгээр үйлчилгээ үзүүлэгчид өөрсдийн улсын хууль, мөн олон улсад хүлээн зөвшөөрөгдсөн хамгаалалтын стандартын дагуу ажилладаг. Гэхдээ өөр улсын шүүх, эрх бүхий байгууллага тэдэнд шаардлага тавих боломжтой гэдгийг та мэдэж байх нь зүйтэй.
9. Хэр хугацаанд хадгалдаг
- Бүртгэл, профайл
- Бүртгэл байх хугацаанд. Хаагдсаны дараа устгах хүсэлтийн дагуу.
- Контент (ном, зураг, сэтгэгдэл)
- Та өөрөө устгах хүртэл. Устгасан зураг файл сангаас мөн устна.
- Үйл хөдлөлийн мэдээлэл
- Санал болголт 180 хоногийн дотор л хардаг. Та хүсэлт гаргавал бүхэлд нь устгана.
- Ном дамжуулалт, өмчлөлийн бичлэг, аудит
- Бүртгэл хаагдсаны дараа ч хадгалагдана. Шалтгаан: нэг номыг тушаасан хүн, авсан хүн, цэг гэсэн гурван тал байдаг бөгөөд нэг нь бүртгэлээ хааснаар бусдын хэрэг хянуулах эрх алдагдах ёсгүй. Ийм бичлэгт таны нэр биш, дотоод танигчийг хадгална.
- Зурвас
- Та харилцааг цэвэрлэх хүртэл. Цэвэрлэсний дараа тэр тал дээр дахин харагдахгүй.
- Мэдэгдлийн хаяг
- Зөвшөөрөл цуцлах, эсвэл хөтөч хүчингүй болох хүртэл.
- Санал хүсэлт, гомдол
- Шийдвэрлэснээс хойш үүнтэй адил тохиолдлыг шалгах хэрэгцээтэй хугацаанд.
10. Хамгаалалт
10.1. Бүх холболт шифрлэгдсэн (HTTPS). Нууц үг нь эргүүлэн уншиж болохгүй хэлбэрээр (hash) хадгалагдана.
10.2. Мэдээллийн сан дээр мөр тус бүрийн хандалтын хяналт (Row Level Security) тавьсан: нэг хэрэглэгчийн хүсэлт нөгөөгийн хувийн мөрийг харах боломжгүй байхаар өгөгдлийн сангийн түвшинд хязгаарлагдсан. Энэ нь програмын кодын алдаа таны мэдээллийг бусдад харуулахаас сэргийлдэг.
10.3. Гэсэн хэдий ч интернэтэд бүрэн аюулгүй систем гэж байхгүй. Бид ямар ч эвдрэл, халдлага гарахгүй гэсэн баталгаа гаргаж чадахгүй. Тиймээс профайл, сэтгэгдэлдээ нийтэд харагдахыг хүсэхгүй мэдээллээ бичихгүй байхыг дахин хүсье.
11. Таны эрх
11.1. Та дараах эрхтэй:
- өөрийн ямар мэдээлэл хадгалагдаж байгааг мэдэх, хуулбар авах;
- буруу, дутуу мэдээллийг залруулах;
- мэдээллээ устгуулах (9-р зүйлд заасан хуулийн болон маргааны хязгаарлалтаас бусад);
- боловсруулалтыг хязгаарлуулах, эсэргүүцэх, тухайлбал санал болголтыг унтраах;
- өгсөн зөвшөөрлөө татах;
- гомдол гаргах (11.4).
11.2. Хэрхэн: нэр, танилцуулга, хот, зураг, тавьсан ном, уншсан номын тэмдэглэгээ, сэтгэгдлээ та өөрөө платформ дээрээс засаж, устгаж болно. Бусад хүсэлтийг (хуулбар авах, бүртгэл бүхэлд нь хаах, үйл хөдлөлийн бичлэг устгах) solio.mn2026@gmail.com хаягаар эсвэл Тусламж хуудсаар ирүүлнэ үү. Бүртгэлээ өөрөө бүрэн хаах товч одоогоор байхгүй тул хүсэлтийг гараар шийдвэрлэдэг.
11.3. Хугацаа: хүсэлтийг хүлээн авснаас хойш ажлын 10 хоногт багтаан хариу өгөхийг зорино. Хүсэлт гаргасан хүн үнэхээр бүртгэлийн эзэн эсэхийг батлах шаардлага гарч болно. Өөр хүний мэдээллийг түүний дүрд хувирсан хүнд өгөхгүйн тулд.
11.4. Гомдол: эхлээд бидэнд хандана уу. Хариу хүлээж авахгүй эсвэл эрх зөрчигдсөн гэж үзвэл Хүний эрхийн Үндэсний Комисс-т, эсвэл шүүхэд гомдол гаргах эрх тань хэвээр.
12. Хүүхдийн мэдээлэл
12.1. Платформыг 18 нас хүрсэн хүн бие даан ашиглана. 14–18 насны хүн эцэг эх, асран хамгаалагчийн зөвшөөрөлтэй ашиглана. 14 нас хүрээгүй хүүхдийн бүртгэлийг зөвшөөрөхгүй.
12.2. 14 нас хүрээгүй хүүхэд бүртгэл үүсгэсэн гэдгийг мэдвэл эцэг эх, асран хамгаалагч solio.mn2026@gmail.com хаягаар бичнэ үү. Бүртгэл болон түүний мэдээллийг устгана.
13. Зөрчил гарвал
13.1. Хувийн мэдээлэл зөвшөөрөлгүй тархсан, эвдэрсэн, алдагдсан тохиолдолд бид үүнийг мэдмэгц шалгаж, аюулыг таслан зогсооно.
13.2. Зөрчил таны эрх, ашиг сонирхолд бодит хохирол үүсгэж болохоор бол танд мэдэгдэнэ: ямар мэдээлэл хамрагдсан, ямар арга хэмжээ авсан, та юу хийвэл зохих талаар. Хуулиар шаардсан тохиолдолд эрх бүхий байгууллагад мөн мэдэгдэнэ.
14. Бодлого өөрчлөгдөх
14.1. Шинэ үйлчилгээ үзүүлэгч нэмэгдэх, шинэ төрлийн мэдээлэл цуглуулах, зорилго өөрчлөгдөх зэрэг агуулгын өөрчлөлт гарвал хувилбарын дугаарыг ахиулж, огноог шинэчилнэ. Үг найруулгын жижиг засвар хувилбарыг ахиулахгүй.
14.2. Таны зөвшөөрөл шаардах өөрчлөлт хийвэл дараагийн нэвтрэлтээр тань дахин зөвшөөрөл асууна.
15. Холбоо барих
Мэдээлэлтэй холбоотой бүх хүсэлт, асуулт, гомдол: solio.mn2026@gmail.com, 9585 9278, эсвэл Тусламж болон санал хүсэлт хуудас.
